საქართველოს განათლებისა და მეცნიერების მინისტრის 2020 წლის 09 მარტის №338 ბრძანების პირველი პუნქტით დამტკიცებული პროგრამით „ინოვაციის, ინკლუზიურობის და ხარისხის პროექტი – საქართველო I2Q (IBRD)” შექმნილი კონკურენტული ინოვაციის ფონდის (CIF) ფარგლებში პირველი საგრანტო კონკურსი მიმდინარეობს.

მსოფლიო ბანკის მხარდაჭერით, I2Q პროექტის ფარგლებში უმაღლესი საგანმანათლებლო დაწესებულებების კონკურენტუნარიანი ინიციატივების საგრანტო დაფინანსებისათვის კონკურენტული ინოვაციის ფონდი (CIF) შეიქმნა. ფონდის შექმნა მიზნად ისახავს საგანმანათლებლო პროგრამებისა და სასწავლო გარემოს გაუმჯობესების ხელშეწყობას.

კონკურენტული ინოვაციის ფონდის (CIF) ფარგლებში პირველი საგრანტო კონკურსი მიმდინარეობს. საკონკურსო განაცხადების წარმოდგენა შესაძლებელია 2023 წლის 20 თებერვლის 23:59 საათამდე ვებ პორტალზე  www.grants.gov.ge.

საქართველოს განათლებისა და მეცნიერების სამინისტრო, მსოფლიო ბანკის მხარდაჭერით, აქტიურად მუშაობს განათლებისა და მეცნიერების 10-წლიან (2022-2032) სტრატეგიასა და სამოქმედო გეგმაზე. დოკუმენტის შემუშავებაში ჩართულები არიან მაღალკვალიფიციური ადგილობრივი და საერთაშორისო ექსპერტები. ექსპერტები პროექტის „ინოვაცია, ინკლუზიურობა და ხარისხი – საქართველო I2Q (IBRD) ფარგლებში, მსოფლიო ბანკის მიერ დადგენილი რეგულაციების მიხედვით, საერთაშორისო ტენდერის საფუძველზე შეირჩნენ.

პროექტი  ინოვაცია, ინკლუზიურობა და ხარისხი – საქართველო I2Q (IBRD) ეფუძნება საერთაშორისო სასესხო ხელშეკრულებას, რომელიც საქართველოს მთავრობამ გააფორმა რეკონსტრუქციისა და განვითარების საერთაშორისო ბანკთან (IBRD) 2019 წლის 18 ივნისს (N8955-GE).

პროექტი  ინოვაცია, ინკლუზიურობა და ხარისხი – საქართველო I2Q (IBRD) მოიცავს ხუთ ძირითად კომპონენტს, რომელთა განხორციელებაც დაგეგმილია 2020-2025 წლებში.