STEM-UPD პროექტის ფარგლებში კახეთის და იმერეთის 22 სკოლას STEM ნაკრებები და 3D პრინტერები გადაეცემა

21 თებერვალს I2Q პროექტის წარმომადგენლები იაკობ გოგებაშვილის სახელობის თელავის სახელმწიფო უნივერსიტეტს (თესაუ) ესტუმრნენ და კონკურენტული ინოვაციის ფონდის (CIF) საგრანტო კონკურსის ფარგლებში დაფინანსებული პროექტის – „STEM კონცეფცია მასწავლებლის მომზადების საგანმანათლებლო საუნივერსიტეტო პროგრამების განვითარებისთვის“ მიმდინარეობას გაეცნენ. პროექტს თესაუსთან ერთად ახორციელებს კონსორციუმი აკაკი წერეთლის სახელმწიფო უნივერსიტეტის (აწსუ), შპს „სთიმითი“ და კოპერნიკის სამეცნიერო ცენტრის შემადგენლობით.

„STEM კონცეფცია მასწავლებლის მომზადების საგანმანათლებლო საუნივერსიტეტო პროგრამების განვითარებისთვის“ (STEM-UPD) ინოვაციურია, რომელიც ითვალისწინებს მოქმედ და მომავალ მასწავლებლებში STEM ცნობიერების ამაღლებას. პროგრამა ემსახურება უნივერსიტეტებსა და სკოლებში STEM მიმართულების გაძლიერებას და მასწავლებლების თანამედროვე მოთხოვნების შესაბამისად მომზადებას. კონსორციუმმა შეიმუშავა ინოვაციური მიდგომები კურიკულუმში, რომელიც თესაუ-ს განათლების მეცნიერებათა ფაკულტეტსა და აწსუ-ს პედაგოგიკის ფაკულტეტზე დაინერგება.

STEM-UPD პროექტის ფარგლებში მნიშვნელოვანი აქტივობები განხორციელდება – თესაუსა და აწსუს ლაბორატორიები აღიჭურვება ქიმიის, ფიზიკის, ბიოლოგიის, გეოგრაფიის, მათემატიკისა და ინჟინერია-რობოტიკის საბაზისო რესურსით. რესურსის გამოყენება შესაძლებელი იქნება ბუნებისმეტყველების სწავლებისას. ის  განკუთვნილია, როგორც მომავალ მასწავლებელთა მოსამზადებლად, ასევე მოქმედი მასწავლებლების გადასამზადებლად

პროექტის ფარგლებში, კონსორციუმის მხარდაჭერით, შეიქმნა STEM კლუბების ქსელი – კახეთისა და იმერეთის რეგიონებში 22 სკოლას ეტაპობრივად გადაეცემა STEM ნაკრებები და 3D პრინტერები. ქსელებს კოორდინირებას გაუწევს უნივერსიტეტების ბაზაზე ჩამოყალიბებული ლაბორატორიები. I2Q პროექტის წარმომადგენლებმა მოინახულეს ქსელში გაწევრიანებული თელავის მე-7 და მე-9 სკოლების STEM კლუბები, სადაც მოსწავლეები აქტიურად იყენებენ STEM ნაკრებებს.

სკოლებში შექმნილი STEM ლაბორატორიების მართვის მიზნით გადამზადნენ უნივერსიტეტების პერსონალი და შერჩეული სკოლების მასწავლებლები. დაგეგმილია STEM მეთოდოლოგიური გზამკვლევისა და სატრენინგო მოდულების შემუშავება. პროექტის ფარგლებში დაიბეჭდება სტატიები რეიტინგულ ჟურნალებში და ჩატარდება კონფერენცია. აღსანიშნავია, რომ მომზადებული სასწავლო კურსები პროგრამის ნაწილი გახდება რეაკრედიტაციისას. STEM კლუბების ქსელი უწყვეტ რეჟიმში იმუშავებს პროექტის დასრულების შემდეგაც.

პროექტის ფარგლებში, STEM რესურსებისა და სასწავლო სცენარების მომზადებასა და დანერგვის მეთოდოლოგიაში მხარდაჭერას უზრუნველყოფს კომპანია „სთიმითი“, ხოლო პერსონალის აკადემიურ გადამზადებისა და STEM კლუბების ქსელის ჩამოყალიბების პროცესში ჩართულია  კოპერნიკის სამეცნიერო ცენტრი (ვარშავა, პოლონეთი).

კონსორციუმის წევრებისგან დაკომპლექტებული სამუშაო ჯგუფი, STEM მეთოდოლოგიასთან დაკავშირებული მასალების მომზადებისა და კვალიფიკაციის ამაღლების მიზნით, გასულ წელს, სასწავლო ვიზიტით იმყოფებოდა კოპერნიკის სამეცნიერო ცენტრში. ისინი გაეცნენ პოლონეთის გამოცდილებას, მათ შორის – ლაბორატორიულ აღჭურვილობას, ინტერაქტიული რესურსების შექმნის მეთოდოლოგიას, STEM პროექტების დანერგვის მეთოდოლოგიურ მიდგომებს ფორმალურ განათლებაში და STEM კლუბების მუშაობის პრინციპებს.

STEM-UPD პროექტის შესახებ სიახლეები მუდმივად ქვეყნდება ვებგვერდზე.