CIF-ის პროექტის ფარგლებში დარგობრივი დასაქმების კვირეული გაიმართა
10-16 მარტს ილიას სახელმწიფო უნივერსიტეტში პირველი დარგობრივი დასაქმების კვირეული გაიმართა. ღონისძიება I2Q პროექტის კონკურენტული ინოვაციების ფონდის საგრანტო კონკურსით დაფინანსებული პროექტის – „განათლება უკეთესი დასაქმებისთვის: პარტნიორობა ინოვაციურ ჯანდაცვაში“ – ფარგლებში გაიმართა. პროექტს ახორციელებს კონსორციუმი ილიაუნისა და BAU-ბათუმის საერთაშორისო უნივერსიტეტთან პარტნიორობით.
პროექტი მიზნად ისახავს ჯანდაცვის სფეროში შრომის ბაზართან ინტეგრირებული უმაღლესი განათლების ხელშეწყობას თანამედროვე, ინოვაციური საგანმანათლებლო პროგრამებისა და მდგრადი, ინტერსექტორული პარტნიორობის განვითარებით. ამისათვის, პროექტის ფარგლებში შექმნილი სახელმწიფო და კერძო უმაღლესი სასწავლებლების კონსორციუმი შეისწავლის ჯანდაცვის ბაზრის საჭიროებებს და იზრუნებს საგანმანათლებლო პროგრამებისა და კვლევების სწრაფ მოდერნიზაციასა და ხელმისაწვდომობაზე. კონსორციუმს პროექტის განხორციელებაში საზოგადოებრივი ჯანდაცვისა და დაწესებულებების მართვის მიმართულებებით პარტნიორობას უწევენ ჰოსპიტალთა ასოციაცია და საერთაშორისო ფონდი „კურაციო“. პროექტი ავითარებს კომპლექსურ მიდგომას ჯანდაცვის სფეროში საგანმანათლებლო დაწესებულებების, დამსაქმებლებისა და სტუდენტების კოლაბორაციის მიზნით.
დასაქმების კვირეულის ფარგლებში ჩატარდა მასტერკლასები და ინტერაქციული საგანმანათლებლო და თანამშრომლობითი შეხვედრები, სამეცნიერო ბლოგების კონკურსის გამარჯვებულთა დაჯილდოება, კონფერენცია, ჯანდაცვის დარგობრივი კარიერული ფორუმი, რომელზეც კომპანიები გაეცნენ დასაქმების მაძიებლებს და შესთავაზეს ვაკანსიები და სტაჟირების პროგრამები.
ფოტო: ილიაუნი