CIF-ის საგრანტო კონკურსის შედეგად დაფინანსებული პროექტი „სადოქტორო განათლების ინტერნაციონალიზაცია საქართველოს უმაღლეს სასწავლებლებში“ წარმატებით მიმდინარეობს
I2Q პროექტის კონკურენტული ინოვაციის ფონდის (CIF) საგრანტო კონკურსის შედეგად დაფინანსებული პროექტის – „სადოქტორო განათლების ინტერნაციონალიზაცია საქართველოს უმაღლეს სასწავლებლებში“ – ფარგლებში, თბილისის სახელმწიფო უნივერსიტეტის განათლების მეცნიერებათა დეპარტამენტის დოქტორანტები 2025 წლის 13-22 თებერვალს სამეცნიერო ხელმძღვანელებთან ერთად სასწავლო ვიზიტით გერმანიაში, იოჰან გუტენბერგის სახელობის მაინცის უნივერსიტეტსა და ოტო ფონ გერიკეს სახელობის მაგდებურგის უნივერსიტეტში იმყოფებოდნენ.
მაინცის უნივერსიტეტის დოქტორანტებმა და სამეცნიერო ხელმძღვანელებმა სამეცნიერო სემინარის ფარგლებში ქართველ სტუმრებს გააცნეს დეტალური ინფორმაცია მათ მიერ წარმოებული კვლევითი პროექტების შესახებ. მათ შორის: საკვლევი თემის განსაზღვრის პრინციპები, კვლევის მეთოდოლოგიისა და ინსტრუმენტების შერჩევის კრიტერიუმები, ადგილობრივი და საერთაშორისო პარტნიორების პროექტში ჩართულობის მნიშვნელობა და ა.შ.
ვიზიტის მონაწილეები ეწვივნენ მაინცის უნივერსიტეტის პროფესიული მასწავლებლის მომზადების ცენტრსაც. ადგილობრივმა სტუდენტებმა და ხელმძღვანელებმა ქართველ სტუმრებს გააცნეს საგანმანათლებლო პროცესის ორგანიზების თავისებურებები. აღნიშნული კომპონენტი განსაკუთრებით საინტერესო იყო იმ ქართველი დოქტორანტებისთვის, რომელთა საკვლევი თემები მასწავლებელთა მომზადებას უკავშირდება.
ოტო ფონ გერიკეს სახელობის მაგდებურგის უნივერსიტეტში ვიზიტისას დოქტორანტები შეხვდნენ ჰუმანიტარულ მეცნიერებათა ფაკულტეტის ადმინისტრაციის წარმომადგენლებსაც. მხარეებმა ისაუბრეს თავიანთი სადისერტაციო ნაშრომების შესახებ, გერმანელი სამეცნიერო ხელმძღვანელებისგან მიიღეს რჩევები კვლევის წარმართვის ორგანიზაციული დეტალების შესახებ. გარდა ამისა, დოქტორანტებს ჰქონდათ შესაძლებლობა, შეუზღუდავი წვდომით ესარგებლათ მაგდებურგის უნივერსიტეტის საბიბლიოთეკო რესურსით და მოეპოვებინათ მათთვის საინტერესო და საჭირო ლიტერატურა.
მაგდებურგის უნივერსიტეტის ინიციატივით, დოქტორანტები და სამეცნიერო ხელმძღვანელები დაესწრნენ გერმანიის საერთაშორისო თანამშრომლობის საზოგადოების (GIZ), გაერთიანებული ერების ორგანიზაციის განათლების, მეცნიერებისა და კულტურის პროფესიული განათლების ცენტრისა (UNESCO-UNEVOC) და მაგდებურგის უნივერსიტეტის მიერ ერთობლივად ორგანიზებულ ხელოვნური ინტელექტისა და პროფესიული განათლების ექსპერტების კონფერენციას.
კონფერენციის ფარგლებში, მონაწილეები გაეცნენ პროფესიული განათლების სფეროში მსოფლიო მასშტაბით ხელოვნური ინტელექტის გამოყენების შესაძლებლობებსა და გამოწვევებს და შეხვდნენ სფეროს საერთაშორისო პროფესიონალებს.
პროექტის – „სადოქტორო განათლების ინტერნაციონალიზაცია საქართველოს უმაღლეს სასწავლებლებში“ მთავარი მიზანი სამი საგანმანათლებლო დაწესებულების სადოქტორო საფეხურზე ინსტიტუციური შესაძლებლობების გაძლიერებაა. კერძოდ, კი ხელს შეუწყობს საგანმანათლებლო დაწესებულების სტუდენტებისა და აკადემიური პერსონალის საჭირო უნარ-ჩვევებით აღჭურვას, ასევე, შესთავაზებს სერვისებს ინტერნაციონალიზაციის შესაძლებლობებით.
პროექტს ახორციელებს ივანე ჯავახიშვილის სახელობის თბილისის სახელმწიფო უნივერსიტეტი (თსუ) კაპოდისტრიის სახელობის ათენის ეროვნულ უნივერსიტეტთან თანამშრომლობითა და კონსორციუმის შემდეგი შემადგენლობით: აკაკი წერეთლის სახელობის ქუთაისის სახელმწიფო უნივერსიტეტი (აწსუ), კავკასიის უნივერსიტეტი, მაგდებურგის ოტო ფონ გერიკეს სახელობის უნივერსიტეტი.