• ქართული
  • English

სიახლეები

CIF-ის პროექტის ფარგლებში თესაუში საერთაშორისო კონფერენცია ჩატარდა

იაკობ გოგებაშვილის სახელობის თელავის სახელმწიფო უნივერსიტეტში 27-28 მარტს ჩატარდა საერთაშორისო სამეცნიერო კონფერენცია – „თანამედროვე ტექნოლოგიების გამოყენება სოფლის მეურნეობაში“. კონფერენცია I2Q პროექტის კონკურენტული ინოვაციების ფონდის (CIF) საგრანტო კონკურსით დაფინანსებული პროექტის – „ინოვაციური აგროტექნოლოგიების ინტეგრირება საგანმანათლებლო პროგრამებში“ – ფარგლებში ჩატარდა და მასში სხვადასხვა ქვეყნის უნივერსიტეტების წარმომადგენლები მონაწილეობდნენ.

ღონისძიების მონაწილეების პრეზენტაციები შეეხებოდა სასწავლო პროცესსა და საგანმანათლებლო პროგრამებში უახლესი აგროტექნოლოგიების დანერგვას.

პროექტი „ინოვაციური აგროტექნოლოგიების ინტეგრირება საგანმანათლებლო პროგრამებში“ მიზნად ისახავს თესაუ-ს აგრონომიის საბაკალავრო და  მევენახეობა და მეღვინეობის საბაკალავრო და სამაგისტრო პროგრამების, აგრეთვე, ალტე უნივერსიტეტის კომპიუტერული მეცნიერების საბაკალავრო პროგრამის მოდერნიზებას. შვედეთის აგრარულ მეცნიერებათა უნივერსიტეტთან თანამშრომლობით თესაუ-ს მევენახეობა და მეღვინეობის სამაგისტრო პროგრამას დაემატება აგროტექნოლოგიური მოდული და დაფუძნდება მინი ლაბორატორიები.

თელავის სახელმწიფო უნივერსიტეტი პირველია, სადაც  CIF-ის პროექტის ფარგლებში მიმდინარეობს თანამედროვე ტექნოლოგიებით აღჭურვილი ჭკვიანი სათბურის მშენებლობა, დაგეგმილია დრონების ლაბორატორიის მოწყობა, აგრონომიის სპეციალობის სტუდენტებისათვის კი მომზადდება ახალი სასწავლო კურსი.

პროექტით გათვალისწინებულია სტუდენტებისთვის აგროტექნოლოგიური ბანაკის ორგანიზება, სასერტიფიკატო კურსების შექმნა და თესაუ-სა და ალტე უნივერსიტეტის აკადემიური პერსონალის გადამზადება. პროექტის ფარგლებში მიღებული აგროტექნოლოგიური ცოდნა გაზიარებული იქნება მოსწავლეების, პროექტის მონაწილე პროფესორები ჩაერთვებიან ტექნოპარკების ტექნოლოგიურ კვირეულებსა და აგრარულ თემებთან დაკავშირებულ ჰაკათონებში.

პროექტი ხორციელდება იაკობ გოგებაშვილის სახელობის თელავის სახელმწიფო უნივერსიტეტის მიერ შვედეთის სოფლის მეურნეობის უნივერსიტეტთან, ფერმერთა ასოციაციასა და ალტე უნივერსიტეტთან პარტნიორობით. პროექტი მიმდინარეობს აგრარულ, საბუნებისმეტყველო მეცნიერებათა და ტექნოლოგიების ფაკულტეტზე, პროფესორ მანანა კევლიშვილის ხელმძღვანელობით.